Rom 4 | MHL | STEP | Aria Mua Maneka wi Yeesus Krais opora wiar opowa muuta nain wi mua kaken eliwa-ke wia naiya. Naeya yiena nomokow fiira Abraham kamenap maiyen?

Romans 4

Mua Maneka Abraham mua kaken eliwa-ke naek

1 Aria Mua Maneka wi Yeesus Krais opora wiar opowa muuta nain wi mua kaken eliwa-ke wia naiya. Naeya yiena nomokow fiira Abraham kamenap maiyen? 2 Mua Maneka opora o feenap maek,

“Abraham eena Mua Maneka opora wiar opow muuta nain mua pina marew, mua kaken eliwa-ke naek.”
(Yenesis 15.6)

Naeya o sira eliwa ookow muuta nain Mua Maneka mua kaken eliwa-ke naekak-na o eliw unuma wame pirekak. Nain o Mua Maneka mokoka-pa unuma wame pirowa me pepek.

4 Aria i miiw mua sira feenap, maa uuwap sesa opimik, me oram aawimik, weetak. Nain yiena uuwamkun sesa yiimik. Nain Mua Maneka i mua pina marew, mua kaken eliwa-ke yia naowa nain me sesa-ke. 5 Ne mua-ko feenap me wame mainon, “Yo sira eliwa oniyem nain Mua Maneka-ke mua kaken eliwa-ke efa nainok.” Nain naap me mainok, weetak, oram Mua Maneka opora wiar opap feenap mainok, “I pina mua nain Mua Maneka-ke pina yiar kakenap yia aawiya,” naap mainok. O Mua Maneka opora wiar opiya neeke o pina marew, mua kaken eliwa-ke nainon. 6 Iiriw owow saria maneka Dewit pun opora kuisow nainiw maek. Feenap:

“Wi mua eena Mua Maneka pina wiar iirariya nain, ne sira puukiwkin kema me wiar suuwiya nain, wi eliw kemeluk. Ne wi mua eena Mua Maneka no pina marew wia naiya nain kema eliwiw ikauk.”
(Someka 32.1-2)

Naap maek. Wi kemelimik nain me wi Moses sira ookow muuta nain Mua Maneka mua kaken eliwa-ke wia naiya, weetak. Wi opora opow muuta nain mua kaken eliwa-ke wia naiya.

9 Aria kemelowa maek nain i mua mia kanima puukamik nain muutiw eliw kemeliyen-i? Ne wi mua mia kanima me puukimik nain weetak-i? Ae, wis pun kemeluk, moram i anane Mua Maneka opor ara oko feenap maimik, “Abraham eena Mua Maneka opora wiar opeya o mua kaken eliwa-ke naek.” 10 Nain ni fain kema suuweka, Abraham mia kamenap ikaeya Mua Maneka-ke naap maek. O iiriw mia kanima puukap ikaeya maek-i, e me puukowa ikaeya maek? Ae, iiriw mia kanima me puukowa ikaeya naap maek. 11 Aria naap ikok aakisa fan Abraham mia kanima puukomamik. O mia kanima puukak nain, fain amisarowa-ke, feenap, Mua Maneka-ke o pina marew, mua kaken eliwa-ke naek. Naapeya makena, wi mua mia kanima me puukimik, nain wi Mua Maneka opora wiar opimik, neeke wi Abraham era wiar ookimik naiyen. Naeya Mua Maneka opora opimik nain teeria maneka onoma os. Naapeya wi nain Abraham onaiya Mua Maneka-ke wi pina marew wia naiya. 12 O wi mia kanima puukow teeria nain wiena nomokow fiira-ke. Aria o iiriw mia kanima me puukowa ikok Mua Maneka opora wiar opam-ikua. Naeya wi naap Abraham yiena nomokow fiira-ke naep sira wiar ookami Mua Maneka opora wiar opam-ikauk.

Wi Mua Maneka opora opimik nain os-ke makena wia opominon

13 Iiriw Mua Maneka ona Abraham ne ona nembesir onaiya opora fain wia maakemi koonowak, feenap, “Ni ikoka miiw maa muutitik nain onamiarowen,” naap maek. Aria opora maakep koonowak nain me Moses sira ookowa-pa makena wiar arek, weetak. Mua Maneka opora wiar opeya o kaken eliwa naek. Nan opora nain makena arek. 14 Moses sira wuomakek nain i puukamkun Mua Maneka kema yia bagiwiriya. Aria Moses sira-ko me wuekak-na ni sira puukam-ikaiman, naap me yia naekamik. Nain wi Moses sira wuomakek nain ookami miiwa fain eliw onamiarekamik-na aria Mua Maneka opora wiar opowa nain kemen marewa ikekak. Naeya Abraham opora maakep koonowak nain pun makena me wiar arekak.

16 Naapeya Mua Maneka wia kemalep wia aawok. Naeya ona opora Abraham maakep koonowak nain o opora wiar opimik nain muutiw makena wiar ariya. Me wi mua Moses sira wuomakek nain ookimik nain muutiw, weetak, opora opow sira Abraham saarik opimik nain pun. Naapeya i unowiya yiena nembesir Abraham waisow. Naeya Abraham nembesir teeria unowiya maa makena nain urufikuan. 17 Moram Mua Maneka opor ara oko Abraham feenap maakek,

“Yo no nefa wuamkun, ikoka miiw unowa nomokow fiira wiar ikainan.”
(Yenesis 17.5)

Ne aria Abraham Mua Maneka opora wiar opak. Mua Maneka eena mua umimik nain wia iikirowiya, ne pun maa muutitik me ikomakek nain ona maeya imenariya, nain.

18 Mua Maneka feenap Abraham maakek,

“Nena nembesir ikoka kerew akena nefar imenarikuan.”
(Yenesis 15.5)

Nain Abraham wame amisarek, ona kekanowa-pa muuka imenowa me pepek. Naep o Mua Maneka muuka imenowa maakek nain kemaiw ikok Mua Maneka opora kekanowa wiar opam-ikua. Aria opora opam-ikua nan miiw unowa teeria unowa maemik, “Abraham-na yiena nembesir-ke.” Mua Maneka Abraham opora maakek nain makena wiar imenarek. 19 Aria makena, Abraham pane-afurak, lawisiw akena mokoma andet kuisow arekak. Ne ona emeria Sara pun panep uroma wuowa me pepek. O nain me kema suuwak, Mua Maneka opora maakep koonowak nain muutiw wiar opap kemaiw ikok opam-ikua. 20 Ne o kema kuisow wuap maek, “Mua Maneka kekanowa onaiya ikua, naapeya ona maek naap eliw oninon.” Kema unu-unowa me wuak, weetak. Opora nain makena-ke naep kekanowa opam-ikua. Naemi Mua Maneka unuma fakeram-ikua. 22 Naap oneya Mua Maneka-ke o pina marew, mua kaken eliwa-ke naek. 23 Ne aria o pina marew naek nain wiar siisimemik, me Abraham waisow naep, weetak. 24 Iiwawun is pun yia naep naap siisimep-puamik. Mua Maneka is pun naap yia oniya, opora wiar opamkun mua kaken eliwa-ke yia naiya. O eena yiena Maneka Yeesus umep ikaeya iikirowak nain. 25 Yeesus-na i pina muuta nain Mua Maneka-ke wi iiwua wapena-pa wiar wueya ifakimemik. Ne o i pina marew, mua kaken eliwa-ke yia naekam naep iikirowak.